Page 1 of 1

آداب الإتصال بالآخرين

Posted: Mon Jun 08, 2020 1:18 pm
by admin
لما نتصل بحد ع الموبايل فيه أداب لازم نراعيها لأننا مش بنبقى عارفين حال الشخص اللى بنتصل بيه فاضى ولا مشغول، زعلان ولا فرحان، سليم ولا تعبان .

- لو مردش أو كنسل مينفعش لأى سبب نتصل أكتر من مرتين ورا بعض،ومتتصلش 5 أو 6 مرات فى نفس اليوم .
- لو الامر عاجل نبعت رساله نصيه انك محتاج تكلمه عشان كذا وكذا
- لو هنتكلم فى موضوع طويل لازم نسأل ف بداية المكالمة اذا وقته يسمح ولا لأ
- لو طلع مش مسجل الرقم بلاش نضيع من وقته نص ساعه فى كلام من عينة (فكر كده ، طب أفتكر، معقول مش عارفني)
- اذا كنت هتبلغه بمصيبه فلازم تتحرى حاله وتتأكد ان الوقت مناسب لأبلاغه

بالنسبه لرسائل الفيس بوك والايميل والواتس :
- اذا بعت رساله وشافها ومردش التمس ليه العذر
- اذا اتاخر عليك كذا يوم بلاش تتقمص، يمكن مشغول ونسي، ابعت رساله بلطف فكره بطلبك،
- عادي ان حد يكون أون لاين وميردش عليك لان دلوقتي ناس كتير شغلها بقي متعلق بالفيس بوك والواتس وبيبقي عندهم ضغط رسايل
- لما تكون محتاج حاجه ادخل ف الموضوع على طول بلاش مقدمات وتقول السلام عليكم وتستني الرد .. مش كل الناس عندها وقت للشات، أحسن طريقه هي : "السلام عليكم، ازيك، انا محتاج كذا كذا"
وأخيرا : أحنا بنكلم أو بنبعت للناس وقت ما تكون ظروفنا تسمح. فهم كمان من حقهم يردوا وقت ما ظروفهم تسمح حتي لو متأخر، ومش كون ان حياة حضرتك هادية وروتينه فده معناه ان كل الناس عندهم نفس النعمه الى ربنا سبحانه وتعالى انعم عليك بيها، والله فيه ناس حياتها مختلفه وزحمه عنك وبيبقي غصب عنهم

#منقول